Vjenë, 31.05.2024
Të nderuara zonja dhe zotërinj, të nderuar anëtarë të Komunitetit Shqiptar të BI të Austrisë, të dashur vëllezër dhe motra!
Siç e dini të gjithë, ndodhemi përpara zgjedhjeve për Parlamentin Evropian që do të mbahen më 9 qershor 2024. Është me rëndësi të madhe që të jemi të vetëdijshëm për përgjegjësinë tonë dhe të marrim pjesë në këto zgjedhje. Dua të theksoj arsyet politike dhe islame pse të gjithë ata që kanë të drejtë vote duhet të japin votën e tyre.
Vota jonë në zgjedhje ka një ndikim të drejtpërdrejtë në të ardhmen e vendit dhe të shoqërisë. Është e rëndësishme të zgjedhim kandidatë që kanë përvojë dhe që janë miq të vendit tonë. Këta persona mund të përfaqësojnë më mirë interesat tona dhe të mbrojnë vlerat dhe nevojat e shoqërisë.
Pjesëmarrja në zgjedhje na mundëson që të ngremë zërin tonë dhe të sigurohemi që njerëzit që kuptojnë dhe përfaqësojnë më mirë interesat tona të zgjidhen në pozita të pushtetit. Është një mënyrë për të sjellë ndryshime pozitive dhe për të siguruar që vlerat dhe shqetësimet tona të dëgjohen.
Në Islam, pjesëmarrja në procesin politik shihet si një formë angazhimi dhe përgjegjësie. Profeti Muhamed (Paqja qoftë mbi të) preferonte të bëhen ndryshime për të mirën me dorë ose me gjuhë dhe në raste pamundësie të paktën të dënohet e keqja me zemër.
Pjesëmarrja në zgjedhje është një mundësi për të sjellë ndryshime pozitive me anë të votës sonë. Është një formë e thirrjes për drejtësi dhe devotshmëri. Duke dhënë votën tonë, kontribuojmë në promovimin e drejtësisë dhe mirëqenies në shoqëri.
Si myslimanë, kemi përgjegjësinë të kontribuojmë për të mirën e shoqërisë. Kjo do të thotë që ne si komunitet duhet të punojmë së bashku dhe të angazhohemi për të mirën e të gjithëve.
Të dashur vëllezër dhe motra, le të kujtojmë shembullin e Profetit Jusuf (Paqja qoftë mbi të). Në një kohë të vështirësive të mëdha dhe sfidave ekonomike, Jusufi i kërkoi mbretit të Egjiptit ta emëronte atë ministër të financave. Jusufi tha: “Më vendos mbi thesarët e vendit; unë jam një ruajtës i ditur.” (Sure Jusuf, 12:55).
Jusufi e kuptoi se përmes pozicionit të tij si ministër i financave mund të luante një rol vendimtar për ta tejkaluar vendin nga kriza në kohëra të vështira. Ai mori këtë përgjegjësi për të siguruar që burimet të shpërndaheshin në mënyrë të drejtë me qëllim që mirëqenia e njerëzve të ishte e siguruar.
Ky shembull na tregon sa e rëndësishme është të marrim përgjegjësi dhe të angazhohemi aktivisht për të përmirësuar shoqërinë. Duke marrë pjesë në zgjedhje dhe duke zgjedhur përfaqësues kompetent dhe të drejtë, ndjekim shembullin e Jusufit dhe kontribuojmë në sigurimin e së ardhmes së shoqërisë sonë.
Pjesëmarrja në zgjedhje është një mënyrë për të treguar këtë unitet dhe angazhim. Ne duhet të përdorim të drejtat tona për të promovuar drejtësinë dhe mirëqenien në shoqëri. Duke zgjedhur përfaqësuesit e duhur, mund të sigurohemi që vlerat dhe vizioni për një shoqëri të drejtë të realizohen.
Të dashur vëllezër dhe motra, zgjedhjet e ardhshme për Parlamentin Evropian janë një mundësi për të ngritur zërin tonë dhe për të sjellë ndryshime pozitive. Le të marrim këtë përgjegjësi seriozisht dhe të sigurohemi që të japim votën tonë.
Të dashur besimtarë, mos harroni se këto zgjedhje të Parlamentit Evropian, përveç rëndësisë së përgjithshme për Austrinë dhe Evropën, kanë edhe një rëndësi të veçantë për ne si shqiptarë. Nuk duhet harruar se edhe Parlamenti Evropian vendos për fatin e shqiptarëve në përgjithësi dhe të Kosovës në veçanti. Prandaj, është detyrimi ynë të përkrahim miqtë e shqiptarëve dhe Kosovës. Votoni kandidatët që kanë ngritur zërin e tyre për interesat e shoqërisë, të drejtat dhe vlerat njerëzore dhe që janë dëshmuar si miq të shqiptarëve në përgjithësi dhe të Kosovës në veçanti.
Zoti na udhëzoftë dhe bekoftë përpjekjet tona për të promovuar drejtësinë dhe mirëqenien në shoqëri. Amin.